Allan Campbell - 23.1.25

Cha bu neònach coimhearsnachdan feadh an t-saoghail a bhith ag ùrnaigh gur ann mar sin a thachras, ach fiù ’s nuair a tha mise a’ sgrìobhadh seo agus am fosadh stèidhichte ’s e dòchas car cugallach a th’ ann agus mòran de luchd- poilitigs, agus mòr-shluagh, Israel ag iarraidh gun lean cogadh gus am bi Hamas air a sgrios gu tur. Ach chan ann san aon àite tha an t-olc agus ged a tha e iomchaidh am milleadh agus am murt do-chreidsinneach a thug ìre an dìoghaltais aig Israel ann an Gaza a chronachadh, cha chòir dìochuimhneachadh an ionnsaigh bhrùideil aig Hamas a thòisich an cogadh seo. ’S fhiach cuideachd a bhith mothachail air na mìltean Phalastaineach a th’ air a bhith an grèim aig Israel fad bhliadhnaichean, agus mar a tha ìre nam prìosanach sin follaiseach anns a’ chothromachadh àireamhan  a tha gan saoradh bho gach taobh. Ach a dh’aindeoin ìre nan dùbhlan a dh’fhàg gun tug e seachd mìosan am fosadh seo a choileanadh, ’s e adhartas beannaichte a th’ ann dha na daoine a th’ air am beatha a thoirt às an t-suidheachadh gu ruige seo, air an ruagadh a’ fulang le dìth taic mheidigeach, dìth bìdh, agus dìth fasgaidh!

Ann an tachartas eachdraidheil eile an t-seachdain seo tha fear a chaidh a dhìteadh airson eucoir a stèidheachadh airson an dàrna turas mar Cheann-suidhe air Ameireagaidh.  ’S iomadh facal mì-chneasta agus gealladh a chualas bho Dhòmhnall Trump, agus mar a tha ùine a’ dol seachad theagamh gur fhiach comhairle agus beagan cofhurtachd a ghabhail bho bheachd àrd-fhear-gnothaich Ameireaganach a thuirt gur fhiach èisteachd ri Trump, ach gun gabhail ris na chanas e gu litireil!  Mar mhòran eile tha mise air Domhnall Trump a chàineadh airson àrdan, gràin-cinnidh,  is burraidheachd, ach feumaidh mi aideachadh gun tug, a rèir coltais, am maoidheadh a rinn e a thaobh an Ear Mheadhanaich buaidh a dh’ionnsaigh fosadh fòirneirt. Tha seanfhacal ag ràdh gur beò duine an dèidh a shàrachadh, ach nach beò e an dèidh a nàrachadh!  An-dràsta ’s a-rithist chithear tachartas a’ dol an aghaidh gliocas sheanfhacail, agus theagamh gum bheil ceist romhainn ach an dearbh Trump sin gu ìre ceàrr dha thaobhsan! Ach is fhiach air duine sam bith na gheallas e, agus chan eil luach ann an gealladh sam bith chun an coileanar e!

’S e gnìomh a dhearbhas, agus saoilidh mi gum bheil sin na dhùbhlan àraid dhan Riaghaltas againn fhìn ann an Lunnainn an-dràsta. Chaidh an taghadh fo bhuaidh gealladh laigse eaconamaidh na dùthcha a chàradh, agus cor an t-sluaigh a leasachadh, ach cha deachaidh mìneachadh mionaideach a dhèanamh air mar a rachadh an obair-leasachaidh sin a chuir air adhart. Cha bhi fios air a’ chràdh gus an tig e, agus ’s i daonnan a’ cheist dè cho fada ’s a dh’ fhuilingear am pian?