Allan's Mod - 17.10.24

Bidh mi tric a’ moladh na h-àireamh a tha a’ cur taic saor-thoileach ri cor na Gàidhlig, agus tha Riaghaltas na h-Alba agus an Comunn Gàidhealach a’ feuchainn ri urram a bhuileachadh air taghadh dhiubh sin gach bliadhna. Chuir na bha an làthair aig an fhosgladh, agus tha mi làn-chinnteach Gàidheil feadh na dùthcha, fàilte chridheil air urram Tosgaire na Gàidhlig 2024 a bhith ga bhuileachadh air Mairead NicÌomhair airson obair ionmholta fad bhliadhnaichean a’ leasachadh Foghlam Gàidhlig, agus Foghlam tro Mheadhan na Gàidhlig!  Chaidh an aon urram cuideachd air a co-ogha Fionnlagh MacLeòid, nach maireann, airson a chuid spàirn fhèin às leth a’ chànain fad iomadh bliadhna. Cha phàigh taing na rinn Mairead neo Fionnlagh, ach ’s math an aithne seo dhaibh. Chaidh duais Neach-ionnsachaidh na Bliadhna gu Harry Josephine Giles à Arcaibh, agus thugadh urram Caraid a’ Mhòid mar aithne air sàr obair a thaobh na Gàidhlig agus nam Mòdan gu Moira agus Sandy Dunlop às A’ Choingheal, Iseabal Banks às an Òban, Margaret Farmer à Tairbeart Loch Fìne, agus Jon ‘Hearach’ Dòmhnallach à Inbhir Nis.

Bha e fìor mhath a bhith a’ cluinntinn Ceit Fhoirbeis ag aithneachadh a’ Mhòid mar aon de mheadhanan brosnachaidh na Gàidhlig, agus bha e cuideachd misneachail cluinntinn gum bheil an Riaghaltas a’ deasachadh freagairt dha molaidhean na h-aithisg bhon bhuidhinn-obrach a stèidhich Ceit fhèin gus beachdachadh air cothroman eaconamach agus sòisealta dhan Ghàidhlig. Le uimhir a’ tachairt aig a’ Mhòd Nàiseanta Rìoghail tha e doirbh taghadh a dhèanamh ann an colbh goirid, ach bha aon rud a shaoil mi a bha tur sònraichte agus b’ e sin an còisir  Aon Ghuth a’ seinn tro mheadhan Makaton aig a’ chuirm Ar Cànan ’s ar Ceòl, feasgar Disathairne seo chaidh. Mo mhìle beannachd air an fheadhainn a chruthaich an cothrom seo dha daoine òga aig nach eil làn-chomas labhairt, an guthan a thogail a’ seinn òrain Ghàidhlig. Ma bha riamh fìreanachadh gu bhith air an t-seanfhacal “nam bu chaomh leat mi, bu bhinn leat mi” tha fhios gun robh an tachartas seo na eisimpleir eachdraidheil! Buaidh is piseach leotha!